Resolución do concurso de poesía escurecida

📝 ✒️✨ A poesía apareceu entre as palabras

Na BiblioCarballeira xa coñecemos as propostas gañadoras do concurso “Para brillar na escuridade”, organizado con motivo das Letras Galegas 2026 que conmemoran a figura de Begoña Caamaño.

Ao longo destes días, o alumnado participou nunha actividade de poesía escurecida, creando novos poemas a partir de textos xa existentes mediante a selección e ocultación de palabras. O resultado foi unha colección de composicións moi orixinais nas que se combinaron lectura, creatividade e expresión artística.

O xurado quere destacar, sobre todo, o enorme nivel e implicación das persoas participantes: houbo 93 proposas a concurso!

📚✨ Grazas a todas as persoas que decidiron buscar poesía entre as páxinas e facer brillar novas palabras desde a escuridade.

📸 Deixámosvos unhas imaxes das obras premiadas:

 

Retos na Biblio: pensamento, estratexia e traballo en equipo

♟️🧩 Na BiblioCarballeira poñemos en marcha unha nova actividade para encher os recreos de desafíos e estratexia: “Retos na Biblio”.

Ao longo de varios días, os equipos participantes terán que resolver diferentes retos relacionados co pensamento lóxico e o xadrez, combinando rapidez, cooperación e capacidade de análise.

Cada recreo contará con tres retos de distinta dificultade —fácil, media e difícil— cos que os equipos poderán sumar puntos para intentar acadar a mellor puntuación final.

👥 Os equipos estarán formados por tres persoas
📅 A actividade desenvolverase nos recreos do 18 ao 21 de maio
📍 Todas as probas realizaranse dentro da biblioteca

🎁 Haberá premio para o equipo gañador!

 

Para brillar na escuridade: concurso de poesía escurecida

✒️ Co gallo das Letras Galegas 2026, dedicadas a Begoña Caamaño, na BiblioCarballeira lanzamos unha proposta creativa e diferente: o concurso de poesía escurecida (blackout poetry) baixo o lema “Para brillar na escuridade”.

Esta técnica consiste en crear un poema a partir dun texto previo, seleccionando palabras e ocultando o resto. O resultado é unha nova composición poética que combina lectura, interpretación e creación artística.

A participación é individual e o xurado valorará tanto a orixinalidade e coherencia do texto como a parte plástica da proposta.

📅 Prazo de entrega: ata o recreo do venres 15 de maio
📍 Entrega: na biblioteca
🎁 Haberá premios en vales de 20 €, 10 € e 5 €

Animamos a todo o alumnado a participar e dar renda solta á súa creatividade.

Día do Libro: xogamos a descubrir libros

📚🌹 Co gallo do 23 de abril, Día do Libro, toda esta semana na BiblioCarballeira puxemos en marcha o concurso “E ti, que libro vés sendo?”, unha proposta lúdica para achegarnos á lectura dun xeito diferente.

A actividade consistiu en adiviñar o título de distintos libros a partir de varias pistas relacionadas coa súa autoría, o seu contido ou algúns detalles significativos. O alumnado participou por equipos, compartindo ideas, debatendo e poñendo a proba o seu coñecemento lector.

Tratouse dunha iniciativa que convertiu a biblioteca nun espazo de xogo, cooperación e curiosidade, ao tempo que se fomenta o interese polos libros e se anima a descubrir novas lecturas.

Día do Libro: libros que se comparten

📚 Na BiblioCarballeira celebramos o Día do Libro cunha proposta sinxela pero moi significativa: un amigo invisible de libros entre o profesorado.

A dinámica consistiu en escoller un libro para outra persoa, pensando nos seus gustos, nas súas lecturas ou naquelas historias que cremos que poden conectar con ela. O resultado foi un conxunto de agasallos envoltos con coidado, cheos de intención e de recomendacións lectoras.

Esta actividade pon en valor unha idea fundamental: os libros non só se len, tamén se comparten. A través deles establecemos vínculos, descubrimos novas voces e ampliamos a nosa mirada.

Celebrar o Día do Libro deste xeito permitiunos reforzar a dimensión social da lectura e lembrar que, detrás de cada libro, hai sempre unha oportunidade de encontro.

📸 Na imaxe, algúns dos libros preparados para este intercambio lector.

 

Concurso: E ti, que libro vés sendo?

📚 Un reto lector polo Día do Libro

Con motivo da conmemoración do Día do Libro (23 de abril), na BiblioCarballeira organizamos a actividade “E ti, que libro vés sendo?”, unha proposta de animación á lectura pensada para poñer a proba a memoria, a intuición e o traballo en equipo.

A dinámica é sinxela: seleccionamos varios libros da biblioteca e, para cada un deles, elaboramos unha ficha con tres pistas sobre o título, a autoría e o contido. A partir destas pistas, os equipos participantes deberán descubrir de que libro se trata e entregar as súas respostas.

Tal e como se recolle no cartel da actividade, o obxectivo é recoñecer obras literarias a partir de indicios, activando coñecementos previos e capacidade de dedución.

A participación realízase por equipos de ata catro persoas, e o equipo que máis libros acerte será o gañador, con premios para as mellores clasificacións .

Esta actividade combina xogo e lectura nunha data especialmente significativa, demostrando que celebrar o libro tamén pode ser unha experiencia participativa e divertida.

Anímate a participar e descubre… que libro es quen de recoñecer! 📖✨

 

Día do Teatro

🎭 Ler, coñecer e representar

Na BiblioCarballeira celebramos o Día do Teatro cunha proposta que combinou divulgación e experiencia escénica.

Por unha banda, o vestíbulo do centro acolleu unha exposición dedicada a Roberto Vidal Bolaño, unha das figuras máis relevantes do teatro galego contemporáneo. Son as fotos que podedes ver máis abaixo. A través dos paneis, o alumnado puido achegarse á súa traxectoria, coñecer a súa obra e comprender o papel fundamental que desempeñou na renovación do teatro en Galicia.

Por outra, o teatro saíu fóra do centro: alumnado da ESO visitou o CEIP A Pedra para representar pequenas pezas teatrais diante do alumnado de primaria. Foi unha experiencia moi enriquecedora, na que se puxeron en xogo a expresión oral, a creatividade e a capacidade de comunicar emocións.

Esta dobre actividade permitiu vivir o teatro desde dúas perspectivas complementarias: como espectadoras e espectadores, pero tamén como protagonistas.

Porque o teatro non só se le: interprétase, compártese e séntese.

 

Día da Poesía

📖 A palabra que nos fai sentir

Cada 21 de marzo celebramos o Día Mundial da Poesía, unha oportunidade para reivindicar a forza da palabra e a capacidade da linguaxe poética para expresar emocións, ideas e experiencias que ás veces resultan difíciles de explicar doutro xeito.

A poesía acompáñanos desde sempre: nos libros, nas cancións, na tradición oral… É unha forma de mirar o mundo con atención, de deter o tempo e de atopar beleza no cotián.

Na biblioteca queremos sumarnos a esta celebración convidando a toda a comunidade educativa a achegarse á poesía: ler un poema, descubrir unha voz nova, volver a un texto coñecido ou atreverse a escribir.

A poesía non é só un xénero literario; é tamén unha maneira de sentir, de pensar e de comunicarse.

Porque, ás veces, unhas poucas palabras son suficientes para dicilo todo.

 

Exposición sobre os dereitos humanos no vestíbulo do centro

🕊️ O vestíbulo do instituto acolle estes días unha exposición sobre a Declaración Universal dos Dereitos Humanos, cedida por Amnistía Internacional.

A mostra presenta, a través de diferentes paneis, algúns dos artigos fundamentais da Declaración aprobada en 1948. Neles recóllense principios básicos como a igualdade entre todas as persoas, a liberdade, a dignidade humana, o dereito á seguridade, á xustiza ou á protección fronte á discriminación.

O obxectivo da exposición é convidar á reflexión e lembrar que os dereitos humanos constitúen a base dunha sociedade democrática e xusta. Coñecelos é o primeiro paso para poder defendelos.

Animamos a toda a comunidade educativa a achegarse ao vestíbulo e dedicar uns minutos a ler os paneis desta exposición, que nos lembra que os dereitos humanos son universais e pertencen a todas as persoas.

 

 

O segundo torneo de xadrez do curso anima os recreos

♟️Ao longo desta semana estamos celebrando na biblioteca o segundo torneo de xadrez do curso, unha actividade que cada ano conta con máis participación e que xa forma parte da vida da BiblioCarballeira.

Durante os recreos, o espazo da biblioteca transfórmase nun lugar de concentración e estratexia. As partidas sucédense entre aperturas estudadas, movementos arriscados e finais moi disputados.

Máis alá da competición, o torneo é tamén unha oportunidade para compartir tempo, aprender uns dos outros e gozar dun xogo que fomenta a planificación, a paciencia e o pensamento lóxico.

O xadrez demostra, unha vez máis, que a biblioteca é tamén un lugar de encontro onde se pode aprender, conversar… e xogar pensando.

 

Exposición Sabías que…? de matemáticas

📐 Matemáticas para descubrir

O vestíbulo do centro acolle estes días a exposición “Sabías que…?”, unha proposta divulgativa que presenta curiosidades e feitos sorprendentes relacionados co mundo das matemáticas.

A través de paneis breves e visualmente atractivos, a mostra ofrece pequenas cápsulas de coñecemento que conectan as matemáticas coa vida cotiá, coa ciencia, coa historia e coa cultura. Trátase dunha invitación a observar con atención e a formular novas preguntas: onde aparecen as matemáticas no noso día a día? Como inflúen nas decisións que tomamos? Que relación teñen coa arte ou coa natureza?

A exposición pretende espertar a curiosidade, romper prexuízos e amosar que as matemáticas tamén poden sorprender e fascinar.

Animámosvos a pasar polo vestíbulo, ler con calma cada panel e deixarvos levar pola capacidade das matemáticas para explicar o mundo.

 

Novo torneo de xadrez

♟️ Novo torneo de xadrez na BiblioCarballeira

A biblioteca volve organizar o seu torneo de xadrez, que se celebrará nos recreos do 9 ao 13 de marzo.

O formato será dinámico, cun ritmo de 5 minutos + 0 segundos por xogador, o que garante partidas intensas nas que a rapidez de pensamento e a capacidade de decisión serán determinantes.

A inscrición está aberta na biblioteca ata o 6 de marzo e, como é habitual, haberá premios para as mellores clasificacións.

O xadrez é moito máis ca un xogo: fomenta a concentración, a planificación, o respecto polas regras e o pensamento estratéxico. A biblioteca consolídase así como un espazo onde a lectura e o coñecemento conviven co desafío intelectual e o encontro entre iguais.

Anímate a participar e prepara a túa mellor apertura.

 

 

 

Encontro con Amnistía Internacional

🌍 Falamos de refuxiados políticos e dereitos humanos

Na BiblioCarballeira tivemos a oportunidade de acoller un relator de Amnistía Internacional, que compartiu con alumnado de 3.º ESO e da F. P. Básica unha sesión centrada na situación das persoas refuxiadas políticas e na defensa dos dereitos humanos.

Ao longo do encontro analizamos as causas que obrigan a miles de persoas a abandonar os seus países, que implica solicitar asilo político e cal é o papel das organizacións internacionais na protección das persoas perseguidas por razóns ideolóxicas, relixiosas ou sociais.

A sesión deu pé a reflexións moi enriquecedor, no que se puxo de manifesto a importancia da información contrastada e do compromiso cidadán.

A biblioteca reafírmase así como un espazo non só de lectura, senón tamén de formación crítica e conciencia social.

11 de febreiro: Día da Muller e a Nena na Ciencia

🔬 Visibilizando referentes, construíndo futuro

Cada 11 de febreiro celebramos o Día Internacional da Muller e a Nena na Ciencia, unha data proclamada pola ONU para recoñecer o papel fundamental das mulleres no ámbito científico e promover a igualdade de oportunidades no acceso ás carreiras STEM (ciencia, tecnoloxía, enxeñaría e matemáticas).

Ao longo da historia, moitas científicas realizaron achegas decisivas ao coñecemento, aínda que con frecuencia quedaron invisibilizadas ou en segundo plano. Recuperar os seus nomes, divulgar os seus traballos e ofrecer referentes femininos ás novas xeracións é unha tarefa necesaria para construír unha sociedade máis xusta e equilibrada.

Desde a BiblioCarballeira sumámonos a esta conmemoración poñendo o foco nas mulleres que investigan, crean e innovan. Durante estes días compartimos no vestíbulo o Cómic Científicas, que tamén tedes dispoñible en liña. Ao lado del podedes ver unha pequena selección de libros con biografías de científicas e uns carteis elaborados polo Club de Ciencia do centro, que están relacionados cunhas prácticas de laboratorio que levaron a cabo esta semana.

A ciencia necesita talento, curiosidade e perseveranza. E ese talento non entende de xénero.

💜 Porque visibilizar é tamén transformar.

🔬 Porque as nenas de hoxe son as científicas do mañá.

 

A Hora de Ler no 2.º trimestre

📖 20 minutos para ler, pensar e medrar

Co inicio do 2.º trimestre, no IES Johan Carballeira retomamos a Hora de Ler, unha actividade que forma parte da nosa aposta polo fomento do hábito lector.

Cada grupo dispón de 20 minutos por clase para a lectura individual, un tempo pensado para favorecer a concentración, a calma e o pracer de ler sen présas. A lectura regular contribúe a mellorar a comprensión, ampliar o vocabulario e desenvolver o pensamento crítico.

📚 Para a Hora de Ler podes traer o teu libro da casa, collelo en préstamo na biblioteca ou escoller un exemplar do armario da aula. O importante é ler e facelo con continuidade.

A Hora de Ler é un pequeno xesto diario que axuda a construír grandes lectores e lectoras. Seguimos lendo, seguimos medrando.

 

Entrega de premios do Torneo de Xadrez

🏆 Remata o torneo na BiblioCarballeira

A BiblioCarballeira acolleu esta semana a entrega de premios do Torneo de Xadrez que se desputou en decembro, poñendo punto final a unha actividade que durante varios días encheu a biblioteca de silencio, concentración e pensamento estratéxico.

As partidas disputáronse durante os recreos, cunha notable participación do alumnado e nun ambiente de respecto, compañeirismo e deportividade. Cada movemento contou, e non faltaron finais axustados nin partidas memorables.

Na entrega de premios recoñeceuse o esforzo das persoas gañadoras, pero tamén a implicación de todo o alumnado participante, que fixo posible un torneo dinámico e moi ben acollido.

📸 Compartimos algunhas imaxes deste peche do torneo (podedes ver a Andrés e a André, os dous primeiros clasificados, xunto co profesor organizador, Venancio), que confirma unha vez máis que a biblioteca é tamén un espazo para xogar, pensar e aprender doutro xeito.

 

Libros de balde na BiblioCarballeira

📚 Dálle unha nova vida aos libros do expurgo

Na BiblioCarballeira puxemos á disposición da comunidade educativa unha selección de libros procedentes do expurgo da biblioteca. Son exemplares que xa non forman parte do fondo activo, pero que seguen tendo moito que ofrecer como lecturas persoais.

📖 Estes libros poden levarse libremente e de balde. Non é necesario rexistro nin préstamo: basta con achegarse, botar unha ollada e escoller os títulos que máis che apetezan.

Son libros que poden atopar unha segunda vida noutras mans e noutros fogares. Porque un libro segue sendo útil mentres alguén o lea.

📍 Pásate pola biblioteca e descubre que historias te están esperando.