🔬 Durante o mes de novembro celebramos o Mes da Ciencia en Galego nas Bibliotecas, unha iniciativa que busca promover a divulgación científica na nosa lingua e achegar o coñecemento científico a toda a comunidade educativa.
Desde a BiblioCarballeira sumámonos a esta celebración cunha exposición de libros de divulgación científica no vestíbulo do IES Johan Carballeira.
A selección reúne obras de diferentes disciplinas, como as matemáticas, a física, a astronomía ou a bioloxía. Entre os títulos expostos atopamos Bocados matemáticos, de Paulo González Ogando; Mate-glifos, de Nicanor Alonso e Miguel Mirás; A ciencia do día a día; ou Sempre tes que meter o nariz, de Víctor Raga. Estas son só algunhas das propostas que nos convidan a descubrir a ciencia desde perspectivas diversas.
Humanidades para a ciencia e a conciencia crítica
A edición deste ano ten como lema «Humanidades para a ciencia e a conciencia crítica», título do manifesto elaborado por Jesús Ángel Sánchez García, catedrático de Historia da Arte da Universidade de Santiago de Compostela.
O manifesto reflexiona sobre a importancia das humanidades para interpretar criticamente a información e as imaxes que nos rodean, especialmente nun contexto marcado polo desenvolvemento da intelixencia artificial. Tamén reivindica o papel das bibliotecas como espazos de coñecemento, investigación e enriquecemento persoal.
Con esta exposición queremos espertar a curiosidade científica, fomentar o pensamento crítico e poñer en valor o galego como lingua de ciencia e divulgación.
📚 Convidamos a toda a comunidade educativa a visitar a exposición e descubrir algunha destas lecturas. Os libros expostos tamén poderán levarse en préstamo, solicitándoo previamente na biblioteca.
Porque a ciencia está en todas partes, e sempre hai algo novo que aprender!
Ningún comentario:
Publicar un comentario