Benvidas e benvidos á BiblioCarballeira!

Co comezo do novo curso, a biblioteca abre as súas portas ao alumnado de 1.º da ESO cunha actividade de formación de usuarios e usuarias. O obxectivo é que coñezan dende o primeiro momento todos os recursos e servizos que teñen á súa disposición e que aprendan a moverse con soltura por este espazo.

Durante a sesión descubrimos como funcionan os préstamos, quen os xestiona, como localizar un libro nos andeis mediante a súa clasificación, como consultar o catálogo OPAC e que normas fan da biblioteca un lugar agradable para estudar, ler e compartir. Tamén presentamos iniciativas como a Hora de Ler, os clubs de lectura, o servizo de préstamo dixital E-LBE.2 e o equipo de voluntariado da biblioteca.

Para rematar, o alumnado participa nun pequeno reto por equipos no que debe localizar distintos libros e poñer en práctica todo o aprendido. Unha forma divertida de familiarizarse coa biblioteca e de comprobar que atopar unha boa lectura tamén pode ser unha aventura. 

Desexámoslles un magnífico curso e agardamos velos moi pronto entre os andeis da BiblioCarballeira 📚

 

 

Únete ao equipo de voluntariado da biblioteca!

A BiblioCarballeira abre unha nova convocatoria para incorporar alumnado ao equipo de voluntariado da biblioteca. Trátase dunha oportunidade para participar activamente na vida do centro, colaborar co funcionamento diario da biblioteca e contribuír a que continúe sendo un espazo acolledor e dinámico para toda a comunidade educativa.

🤝🤝As persoas voluntarias colaboran na atención da biblioteca durante os recreos, realizan préstamos e devolucións mediante Koha, axudan a compañeiros e compañeiras, comunican incidencias ao profesorado responsable e participan na organización das actividades que se desenvolven ao longo do curso.

🎀📜 Ademais da experiencia persoal e do traballo en equipo, o alumnado participante recibirá un diploma oficial da Xunta de Galicia como recoñecemento ao seu labor.

Se queres implicarte, aprender e axudar a que a biblioteca siga medrando, anímate a formar parte do equipo. Pequenas accións poden facer unha gran diferenza. 📚💙

Benvida ao curso 2026/2027

 A biblioteca do IES Johan Carballeira inicia un novo curso con moita ilusión e con ganas de seguir sendo un espazo de encontro para toda a comunidade educativa.

Nos próximos meses volverán os clubs de lectura, as exposicións, os concursos, as recomendacións lectoras, as actividades arredor das efemérides, o xadrez, as novidades bibliográficas e moitas outras propostas coas que queremos facer da biblioteca un lugar vivo, acolledor e cheo de oportunidades para aprender, descubrir e compartir.

Convidámosvos a achegarvos á BiblioCarballeira, explorar os seus fondos, participar nas actividades e facer da lectura unha compañeira de viaxe ao longo de todo o curso.

Bo curso 2026/2027! 📚

 

Resumo dos préstamos do curso 2025/2026

📚 Co remate do curso, na BiblioCarballeira facemos balance da actividade lectora desenvolvida ao longo destes meses. Un dos indicadores máis significativos é o movemento de préstamos, que amosa o uso real dos fondos e a presenza da biblioteca na vida diaria do centro.

Durante o curso 2025/2026 realizáronse 1221 préstamos. Foron prestados 868 fondos distintos, o que reflicte unha circulación moi variada da colección e o interese por lecturas diversas.

Outro dato especialmente relevante é que estes préstamos chegaron a 165 persoas usuarias, entre alumnado, profesorado e outros membros da comunidade educativa.

 

Máis alá das cifras, cada préstamo representa unha historia escollida, unha consulta, unha recomendación ou un momento de lectura. Estes datos animan a seguir traballando para que a biblioteca continúe sendo un espazo vivo, aberto e útil para toda a comunidade educativa.

Grazas a todas as persoas que fixestes uso da biblioteca ao longo deste curso. Seguimos lendo!

 

Preparando as lecturas do verán

☀️📚 Achégase o final de curso e na BiblioCarballeira xa estamos traballando para que non falten boas lecturas durante as vacacións. Estes días estamos catalogando novidades que quedan á vosa disposición nos andeis da biblioteca, listas para chegar ás mans da comunidade educativa.

Temos á vosa disposición propostas para distintos gustos e idades: novelas que enganchan, historias para viaxar sen saír da casa, libros para pensar, cómics, aventuras, misterio, fantasía ou divulgación. O obxectivo é ofrecer unha selección variada que permita atopar unha lectura axeitada para cada persoa. Só tedes que achegarvos á biblioteca e pedir o que vos apeteza ou solicitar recomendacións.

🎥 E isto non queda aquí!
Ao longo destas últimas semanas estamos publicando na nosa canle de Instagram as nosas vídeo recomendacións lectoras de verán. Cando todas vexan a luz, recompilarémolas neste mesmo blog para que as teñades xuntiñas.

📖 O verán lese mellor cun bo libro na man.

Chegan as recomendacións lectoras para o verán

☀️📚 Co fin de curso cada vez máis preto, na BiblioCarballeira xa estamos preparando unha das nosas citas habituais: as recomendacións lectoras para o verán.

🎥 Aquí tedes pequenos vídeos nos que compartimos libros que gustaron especialmente e que consideramos boas lecturas para os meses de descanso. Ao longo dos últimos días de clase actualizaremos esta entrada con máis vídeos.

Lecturas para descubrir novos mundos, aprender cousas novas ou simplemente pasar un bo intre.

Porque o verán é tamén unha oportunidade para ler sen présas e deixar que os libros nos acompañen durante as vacacións.

📚 E ti, xa sabes que libro vas levar este verán na mochila?

#bach #adutos	#1e2eso

#dende2eso	#dende3eso

#2e3eso	#eso

#bach #adultos	#3e4eso #1bach

#bach #adultos	#bach #adultos

#bach #adultos	#eso

#eso	#eso

	#eso

                                       

Resolución do concurso de poesía escurecida

📝 ✒️✨ A poesía apareceu entre as palabras

Na BiblioCarballeira xa coñecemos as propostas gañadoras do concurso “Para brillar na escuridade”, organizado con motivo das Letras Galegas 2026 que conmemoran a figura de Begoña Caamaño.

Ao longo destes días, o alumnado participou nunha actividade de poesía escurecida, creando novos poemas a partir de textos xa existentes mediante a selección e ocultación de palabras. O resultado foi unha colección de composicións moi orixinais nas que se combinaron lectura, creatividade e expresión artística.

O xurado quere destacar, sobre todo, o enorme nivel e implicación das persoas participantes: houbo 93 proposas a concurso!

📚✨ Grazas a todas as persoas que decidiron buscar poesía entre as páxinas e facer brillar novas palabras desde a escuridade.

📸 Deixámosvos unhas imaxes das obras premiadas: