Únete ao equipo de voluntariado da biblioteca!

A BiblioCarballeira abre unha nova convocatoria para incorporar alumnado ao equipo de voluntariado da biblioteca. Trátase dunha oportunidade para participar activamente na vida do centro, colaborar co funcionamento diario da biblioteca e contribuír a que continúe sendo un espazo acolledor e dinámico para toda a comunidade educativa.

🤝🤝As persoas voluntarias colaboran na atención da biblioteca durante os recreos, realizan préstamos e devolucións mediante Koha, axudan a compañeiros e compañeiras, comunican incidencias ao profesorado responsable e participan na organización das actividades que se desenvolven ao longo do curso.

🎀📜 Ademais da experiencia persoal e do traballo en equipo, o alumnado participante recibirá un diploma oficial da Xunta de Galicia como recoñecemento ao seu labor.

Se queres implicarte, aprender e axudar a que a biblioteca siga medrando, anímate a formar parte do equipo. Pequenas accións poden facer unha gran diferenza. 📚💙

Libros de balde na BiblioCarballeira

📚 Dálle unha nova vida aos libros do expurgo

Na BiblioCarballeira puxemos á disposición da comunidade educativa unha selección de libros procedentes do expurgo da biblioteca. Son exemplares que xa non forman parte do fondo activo, pero que seguen tendo moito que ofrecer como lecturas persoais.

📖 Estes libros poden levarse libremente e de balde. Non é necesario rexistro nin préstamo: basta con achegarse, botar unha ollada e escoller os títulos que máis che apetezan.

Son libros que poden atopar unha segunda vida noutras mans e noutros fogares. Porque un libro segue sendo útil mentres alguén o lea.

📍 Pásate pola biblioteca e descubre que historias te están esperando.

 

O recuncho dos xogos de mesa, un clásico da nosa Biblioteca

Entre todas as actividades que se desenvolven na Biblioteca do IES Johan Carballeira, hai unha que sempre destaca polo éxito e a participación: o recuncho dos xogos de mesa.

Dende hai tempo, este espazo é un punto de encontro durante os recreos, no que o alumnado vén xogar, divertirse e compartir tempo cos seus compañeiros e compañeiras. Pero non se trata unicamente dun pasatempo: os xogos de mesa axudan a mellorar a estratexia, a cooperación, a concentración e, sobre todo, favorecen a convivencia.

A boa acollida que sempre teñen demostra que aprender tamén pode ser lúdico e que a biblioteca é moito máis ca un lugar para ler: é un espazo vivo, aberto e participativo.

Se aínda non xogaches, convidámoste a probar: seguro que atopas un xogo axeitado para ti. Temos bastante variadade. E, se non, achégate a quen estea de garda na biblioteca para preguntar polos xogos que máis che gustan. Igual podemos compralo!

 

Un novo curso e retomamos o blog

Comezamos un novo curso escolar, o 2025/2026. Un ano máis chega cargado de ilusións, retos e proxectos. A Biblioteca Escolar do IES Johan Carballeira quere ser, unha vez máis, un espazo aberto á lectura, á información, á aprendizaxe e á convivencia.

Este blog retoma a súa actividade para compartir convosco novidades, recomendacións lectoras, propostas de dinamización, actividades culturais e recursos que poidan enriquecer o día a día do noso alumnado e profesorado.

Queremos que a biblioteca siga a ser un lugar de encontro, de descubrimento e de creación, onde todas as persoas teñan cabida. Aquí atoparedes información práctica sobre o funcionamento da biblioteca, pero tamén propostas para participar, colaborar e gozar coa lectura e coa cultura.

Agardamos a vosa visita, tanto no espazo físico da biblioteca como neste espazo virtual. Contamos convosco para facer da nosa biblioteca un lugar vivo, participativo e sempre en movemento.

Lembrade que nos podedes seguir en Instagram, e tamén podes consultar unha presentación da biblioteca na páxina web do noso centro. 

Benvidas e benvidos ao novo curso. Imos enredar xuntos entre libros, historias e aprendizaxes!

Con azos renovados

Chega un novo setembro, e a biblioteca do IES Johan de Carballeira está de volta. Xa estamos comezando a pensar nas actividades que se celebrarán este curso.

Coma sempre, a biblioteca pode ser o teu espazo de referencia: un lugar aberto a todas para ler, para compartir, para aprender.

Lembra que nos podes seguir en Instagram, e tamén podes consultar unha presentación da biblioteca na páxina web do noso centro. 

Novos carteliños para Biblio Carballeira

 

VISITA DE EVA MEJUTO AO NOSO CENTRO

O 23 de novembro pola tarde visitounos a escritora Eva Mejuto, que co seu libro nos chegou ao corazón. Explicounos como escribiu a súa creación e o traballo que dá. Foi unha parrafada moi interesante e amena. Ao final despedímonos dela e agradecemos que viñese. Martín Fernández Leal 3ºA

Eva Mejuto é unha escritora de cabelo non moi longo, liso e marrón, tirando a louro, de estatura media e con lentes. Escribiu libros como A casa da mosca chosca, Tres desexos... 22 segundos foi o libro sobre o que tivemos a charla o alumnado de terceiro de 3º ESO A e B. Fixemos preguntas de todo tipo e respondeunos a todas. Ás veces parecía quedar sen palabras ante tanta participación, pero ela conseguiu seguir respondendo. Contounos, entre outras cousas, que o portada do libro é unha foto do seu amigo Adrián e a súa importancia na historia do libro. Tamén nos contou que creou o avó coma o avó que lle gustaría ter, xa que non coñeceu aos seu avós. Fíxose curta a charla. Miguel Peixoto Riobó 3ºB

CARBALLEIRA SEGUE AO RITMO DAS LETRAS

O 17 de maio o Departamento de Lingua e Literatura Galega puxo en marcha esta actividade para compartirmos música en galego nas redes sociais. Hoxe, 31 de outubro, volve celebrarse o Día das Letras Galegas. Aquí tedes algunhas das participacións, pero podedes consultar o resto ou facer novas recomendacións na historia destacada do nosto Instagra "L. Galegas". Novamente, feliz día! #diadasletrasgalegas #RicardoCarvalhoCalero https://www.instagram.com/p/CHA0lagiIc2/?igshid=by4cuf7i4e78