Biblio Carballeira

O seu obxectivo é recoñecer o labor das mulleres na literatura e loitar contra a discriminación que, ao longo da historia, silenciou tantas voces femininas. A esencia desta celebración é reivindicar as palabras das escritoras, lembrar o seu legado e descubrir novas voces que seguen transformando o mundo desde a literatura.

Na Biblioteca do IES Johan Carballeira sumámonos a esta celebración con lecturas, exposicións e recomendacións de autoras galegas, españolas e internacionais. Poesía, narrativa, ensaio, divulgación ou banda deseñada: múltiples camiños para expresar o talento das mulleres que escriben.

👉 Pásate pola biblioteca e bota unha ollada á nosa selección de títulos: atoparás obras para emocionarte, pensar e descubrir perspectivas que enriquecen o noso modo de entender o mundo.

👍 Queremos agradecer ao IES Lamas de Castelo que modificase e traducise ao galego o logo oficial proposto para esta edición pola Biblioteca Nacional. É o que podes ver un pouco máis arriba.

Un curso máis, o IES Johan Carballeira participa na iniciativa da Hora de Ler, un tempo semanal que todas as clases dedican á lectura individual. Son 20 minutos por sesión, ao principio ou ao final da clase, para que cada estudante poida desconectar, concentrarse e deixarse levar polas páxinas dun libro.

O luns 13 de outubro comezamos con esta rutina. Lembrádeo para traer o libro que máis vos apeteza. 

 

A lectura diaria é un hábito que trae múltiples beneficios: mellora a fluidez, enriquece o vocabulario, potencia a imaxinación e contribúe a formar un pensamento crítico. Non importa o que leas —novela, poesía, banda deseñada, divulgación— o importante é que o fagas con gusto.

Na biblioteca temos moitas opcións para escoller: podes traer o teu libro da casa, collelo en préstamo na biblio ou empregar un dos exemplares do armario da aula.

Lembrade: a lectura é obrigatoria, pero tamén é un pracer. Canto máis les, máis ganas tes de seguir lendo.

Entre todas as actividades que se desenvolven na Biblioteca do IES Johan Carballeira, hai unha que sempre destaca polo éxito e a participación: o recuncho dos xogos de mesa.

Dende hai tempo, este espazo é un punto de encontro durante os recreos, no que o alumnado vén xogar, divertirse e compartir tempo cos seus compañeiros e compañeiras. Pero non se trata unicamente dun pasatempo: os xogos de mesa axudan a mellorar a estratexia, a cooperación, a concentración e, sobre todo, favorecen a convivencia.

A boa acollida que sempre teñen demostra que aprender tamén pode ser lúdico e que a biblioteca é moito máis ca un lugar para ler: é un espazo vivo, aberto e participativo.

Se aínda non xogaches, convidámoste a probar: seguro que atopas un xogo axeitado para ti. Temos bastante variadade. E, se non, achégate a quen estea de garda na biblioteca para preguntar polos xogos que máis che gustan. Igual podemos compralo!

No IES Johan Carballeira retomamos o noso Club de Lectura Rolendis, unha actividade pensada para gozar da lectura en compañía e descubrir novas historias ao longo do curso.

Cada trimestre o grupo escollerá un libro diferente, que leremos e comentaremos entre todas e todos, convertendo cada encontro nun espazo de conversa, reflexión e diversión compartida.

O club está aberto a todo o alumnado interesado. Só tes que pasar pola Biblioteca e anotarte. Ademais de ler, teremos ocasión de falar das nosas impresións, de conectar coas personaxes e de viaxar con elas a mundos reais e imaxinados.

Se che apetece ler e desfrutar xunto ao resto da comunidade educativa, apúntate xa ao Club de Lectura Rolendis. Prometemos aventuras, emocións e moi boas conversas arredor dos libros.Temos varias opcións: club de manga, club de narrativa, club en inglés...

Pronto chega o Samaín e, con el, unha das actividades máis esperadas da nosa Biblioteca: nada máis e nada menos que o II Concurso de Epitafios.

A proposta é sinxela e divertida: inventar un epitafio orixinal e escribilo sobre unha lápida, tumba ou sepultura feita por ti, personalizada ao teu gusto. Valoraranse especialmente a creatividade, a claridade e o uso expresivo da lingua.

O prazo remata o mércores 29 de outubro, á hora do recreo, e os traballos quedarán expostos na Biblioteca durante estas datas tan especiais. Concederanse tres premios en forma de cheques-regalo para a cafetería do centro (30 €, 20 € e 10 €).

Se precisas inspiración, premendo na imaxe seguinte podes consultar unha guía para a elaboración de epitafios. Aí tes exemplos e trucos creativos que preparamos para axudarvos, así como as bases completas do concurso.

Anímate a participar e sorpréndenos co teu humor, ironía ou lirismo. Que non quede soterrada a creatividade!

O inicio da etapa no instituto trae consigo moitas novidades, e unha das máis especiais é descubrir a nosa biblioteca escolar. Estes días recibimos ao alumnado de 1.º da ESO para coñecer de preto este espazo que, máis alá dun lugar de estudo, é tamén un punto de encontro, de intercambio e de creatividade. Lemos libros, xogamos a xogos de mesa, participamos en concursos...

Durante a visita explicámoslles como está organizada a biblioteca, como funcionan os préstamos e devolucións e algunhas actividades que se van desenvolver ao longo do curso. Tamén descubriron os recantos de lectura, os xogos de mesa e os centros de interese.

Con este recibimento queremos que se sintan parte da comunidade lectora do IES Johan Carballeira e que vexan a biblioteca como un lugar propio no que aprender, compartir e crecer.

Queres formar parte do equipo de alumnado voluntario da Biblioteca do IES Johan Carballeira?

O voluntariado é unha oportunidade para colaborar no día a día da nosa biblioteca: atender no recreo, axudar coas tarefas de préstamos e devolucións, manter a orde nos andeis e, sobre todo, facer que a biblioteca sexa un espazo vivo e aberto para todo o alumnado.

Porque cando ti axudas, todas e todos medramos. Cada pequena acción suma, e grazas ao voluntariado a biblioteca gaña vida e o centro medra.

📅O mércores 17 de setembro, no recreo, teremos unha reunión inicial para explicar o funcionamento e recibir ao novo equipo.

Se che gusta ler, organizar, colaborar ou simplemente pasar un bo rato facendo que a biblioteca sexa mellor… anímate a participar!