Biblio Carballeira

Este martes tivemos a grandísima sorte de recibir no noso instituto a Ledicia Costas, autora galega de moitos libros que nos encantan. Un deles, "Jules Verne e a vida secreta das mulleres planta", forma parte dese feixe de obras que estamos lendo e traballando para prepararmos a II Feira da Ciencia e Literatura. A nosa Feira terá lugar o 4 de maio en Bueu, pero xa vedes que non paramos cos preparativos!
Tensi Gesteira, a nosa colaboradora e a persoa que está detrás do galardoado blog "Lecturafilia", non quixo perder a cita para presentar á nosa convidada e compartir ese momento connosco.
Ademais do alumnado de primeiro, e o de segundo e terceiro do Club de Lectura, estivo connosco a rapazada do CEIP Montemogos, que veu con moitas ganas de participar e non deixou de facerlle preguntas a Ledicia.





Ledicia fíxonos rir, contounos anécdotas da súa vida, explicounos por que son como son algúns dos seus personaxes, aconsellounos que facer para chegar a escribir un libro e sobre todo, conseguiu que o tempo pasara voando do ben que o pasamos.
Sabiamos que ela era "Cortalumes", e como moitos de nós tamén o somos, aproveitamos para entregar os diplomas ao alumnado que acredita o seu compromiso cos nosos montes.
Preme e verás e que consiste o noso compromiso.


Por suposto, convidamos a Ledicia á nosa II Feira da Ciencia e Literatura, pois este ano, unha das súas obras volve a estar presente nela. E todos vós, xa sabedes, facede oco nas axendas para o 4 de maio!