Biblio Carballeira

Este Entroido tardío, tan próximo ao mes de marzo ou mes da muller, convertiuse no IES Johan Carballeira nunha oportunidade de ouro para reivindicar a necesaria igualdade de xénero.
O equipo da biblioteca quixo dirixir unha ollada á situación real das mulleres na nosa sociedade e facer balance, festexando os avances e loitando pola superación dos atrancos.

E se hai un personaxe que retrata con fidelidade a vida de moitas mulleres da nosa contorna esa é Dora A Desbrozadora, gran metáfora da idiosincrasia desa muller forte, traballadora e voluntariosa, labrega, mariñeira e galega.
         

Dora A Desbrozadora non necesita presentación no Morrazo e ben merecía esta humilde homenaxe.

 Ela é un dos personaxes de máis sona entre os creados polo humorista gráfico Luís Davila, nado en Bueu e vencellado dende a súa infancia a este concello, onde medrou e estudou no noso instituto, e onde reside actualmente. 

Davila, alcumado "O Bichero", ten o mérito de reflexar nas súas viñetas do xornal Faro de Vigo ese particular humor galego, sacando punta aos esteorotipos, combinando unha fina retranca e un tratamento irónico e intelixente da actualidade, que fai por igual rir e cavilar aos seus fieis lectores.

E así, mesturando o Entroido coa homenaxe á muller, xurdiu a idea de formar unha comparsa de profesores do instituto disfrazados da gran Dora.

Este audiovisual fai unha oda á modernidade da tradición, unha viaxe artística aos valores positivos da herdanza feminina e, por suposto, un tributo ao simbolismo da bata, unha prenda de traballo que acompañou a nais e avoas durante décadas. 

A artista austríaca, Petra Buchegger, autora da investigación da que parte esta curta, opina que Galicia é “El Dorado das batas”. 

                           

E, sen máis, deixámosvos co que sabemos que estades devecendo por ver: a reportaxe fotográfica dos profesores e profesoras que participaron na nosa comparsa.