Club de Lectura do Profesorado

📖 Compartindo lecturas, ideas e conversas na BiblioCarballeira

A BiblioCarballeira tamén é un espazo de encontro para o profesorado, que este curso participa nun club de lectura propio no que a lectura se converte en punto de partida para conversar, reflexionar e gozar da palabra compartida.

Escollemos diferentes obras, procurando que nos axude a pensar o mundo, a educación e a vida dende perspectivas diversas. Nesta ocasión lemos 👉 Panza de burro, de Andrea Abreu.

As sesións de lectura son momentos de calma e diálogo, nos que deixamos por un intre o ritmo das aulas para falar de libros, personaxes e emocións, pero tamén para seguir aprendendo xuntos e tecer comunidade arredor da literatura.

📚 A lectura é un pracer que medra cando se comparte… e na BiblioCarballeira facémolo realidade tamén entre profesoras e profesores.

 

Boas festas con lecturas da BiblioCarballeira

🎅 Xa se achegan as vacacións de Nadal!

A porta da BiblioCarballeira xa anuncia o espírito destas datas: libros, ilusión e boas lecturas para compartir. Este Nadal queremos acompañarte tamén fóra do instituto cunha selección especial de títulos para todas as idades e gustos.

Dende novelas que emocionan ata relatos curtos para ler ao carón do lume, cómics, poesía ou divulgación científica… hai un libro perfecto esperando por cada lector e lectora.

📚✨ Podes consultar a nosa lista de recomendacións de Nadal premendo nesta ligazón 🔗 As nosas lecturas para o Nadal

Lembra: se queres levar un libro en préstamo antes das vacacións, entra na biblioteca e notifícallo á persoa de garda. E se non che acae ningunha das recomendacións, pide consello na biblio que seguro que atopamos algo que che guste.

🎄 Que este Nadal veña cheo de boas lecturas e mellores historias!

 

Torneo de Xadrez na BiblioCarballeira

♟️Estratexia, concentración e moita emoción entre taboleiros.

A BiblioCarballeira converteuse esta semana nun auténtico campo de batalla… pero de ideas. Estamos a celebrar o noso Torneo de Xadrez, unha das actividades máis agardadas e con maior participación entre o alumnado.

Durante os recreos, a biblioteca encheuse miradas concentradas e movementos medidos. Cada partida é un reto: pensar con calma, anticipar o que vai facer o rival e atopar o xeque mate perfecto.

O torneo está a reunir xogadores e xogadoras de distintos cursos, nun ambiente de respecto, compañeirismo e moita deportividade. E, por suposto, tamén de nervios e diversión!

Nos próximos días coñeceremos as persoas gañadoras, pero o máis importante é o espírito que se respira: o xadrez como forma de aprender a pensar, decidir e compartir.

📸 Deixámosvos algunhas imaxes do torneo en marcha e animámosvos a achegarvos á biblioteca para seguir as partidas finais.

 

25N: Día Internacional para a Eliminación da Violencia contra as Mulleres

💜 O alumnado reinterpretou Baldosas, de Carlos Negro, e encheu o vestíbulo de voces contra a violencia machista

Con motivo do 25 de novembro, Día Internacional para a Eliminación da Violencia contra as Mulleres, o alumnado do IES Johan Carballeira participou nunha actividade de creación literaria inspirada no poema Baldosas, do escritor galego Carlos Negro.

A proposta consistiu en tomar como punto de partida os versos do autor e elaborar pequenas pezas poéticas propias, textos breves que transforman o chan cotián das “baldosas” en espazo simbólico para a denuncia, a reflexión e o compromiso.

O resultado é unha colección de textos intensos, valentes e cheos de sensibilidade, nos que o alumnado converteu a palabra en ferramenta contra a violencia machista. As creacións quedaron expostas no vestíbulo do instituto, construíndo un corredor de voces que interpelan, emocionan e fan pensar a quen pasa por alí. Tamén se proxecta un vídeo elaborado a partir de parte destas propostas.

📍 Agradecemos ao alumnado a súa implicación e creatividade, e animamos a toda a comunidade educativa a visitar a exposición, ler con calma cada proposta e continuar sumando pasos para unha sociedade máis xusta e libre de violencia.

🔗 Podedes ver o vídeo que montamos cunha selección dos poemas nesta ligazón: https://youtu.be/dsVK7pdHk9A 

 

Torneo de Xadrez na BiblioCarballeira

♟️A estratexia vólvese protagonista este decembro

Chega unha das actividades máis esperadas da nosa biblioteca: o Torneo de Xadrez da BiblioCarballeira. Durante a semana do 1 de decembro, a biblioteca converterase nun taboleiro de 64 cadros no que o alumnado poderá poñer a proba a súa capacidade de análise, paciencia e estratexia.

As partidas xogaranse durante os recreos, cun ritmo de 5 minutos + 0, o que promete emoción e partidas rápidas.

Podes consultar as normas completas e inscribirte directamente na biblioteca. Haberá premios para as persoas gañadoras, pero tamén moito bo ambiente e ganas de aprender.

📍Pásate pola biblio, apúntate e participa!
Porque o xadrez é tamén unha forma de pensar, crear e compartir.

 

Entrega de premios do concurso "De quen é esta biblioteca?"

🏆🏆🏆 Un xogo para coñecer as bibliotecas do profesorado

Co gallo do Día das Bibliotecas, a BiblioCarballeira organizou o concurso De quen é esta biblioteca, unha proposta que espertou moita curiosidade entre o alumnado e o profesorado. A actividade consistía en identificar a quen pertencía cada unha das bibliotecas persoais do profesorado, a partir das fotografías expostas na biblioteca.

Durante varios días, o alumnado achegouse a participar, observando os detalles, tentando adiviñar gustos literarios e descubrindo que cada biblioteca conta unha historia sobre quen a le.

Hoxe puxemos o broche final coa entrega de premios á persoas gañadora, que demostrou un gran tino e moita atención aos detalles. Eran 17 as bibliotecas que había que asociar cun nome, e Edu acertou 8. Non está nada mal!

📸 Deixámosvos aquí unha imaxe do momento no que Edu recolleu un exemplar de El esplendor de la América Española, o libro que escolleu como galardón. 

Agradecemos a todo o alumnado participante pola súa implicación. Unha actividade que fixo da biblioteca un espazo de xogo, curiosidade e lectura compartida.

 

Entrega de premios do II Concurso de Epitafios

Creatividade, humor e moito talento na BiblioCarballeira

🏆🏆🏆 O Samaín rematou na BiblioCarballeira coa entrega de premios do II Concurso de Epitafios, unha actividade que volveu encher a biblioteca de humor, imaxinación e letras.

Durante os últimos días, o alumnado puido visitar a exposición de lápidas e epitafios creados para o concurso, nos que se mesturaban a creatividade literaria, o enxeño e a expresión artística. Hoxe puxemos o broche final coa entrega dos premios ás persoas gañadoras, que recibiron os seus cheques-regalo para a cafetería do centro.

O xurado destacou a orixinalidade, o uso da lingua e a capacidade para emocionar ou facer sorrir de moitas das propostas presentadas.

📸 Deixámosvos algunhas imaxes da entrega, na que as persoas premiadas ensinan con orgullo a súa creación.

Parabéns a todo o alumnado participante por darlle vida a esta actividade tan singular!

1.º premio: Hugo e Noé

2.º premio: Julia e Leire

 

3.º premio: Aitor e Martín

 

Exposición de ilusións ópticas

👁️A ciencia que xoga co que vemos

Dentro das actividades do Mes da Ciencia en Galego, a BiblioCarballeira preparou unha exposición moi especial: unha mostra de ilusións ópticas que nos invita a cuestionar o que vemos e a descubrir como funciona a nosa percepción.

As ilusións ópticas son un excelente exemplo de como a ciencia pode sorprendernos e divertirnos ao mesmo tempo. A física, a bioloxía e mesmo a psicoloxía únense para explicar por que os nosos ollos —e o noso cerebro— ás veces nos fan ver movemento onde non o hai, liñas que se dobran ou cores que cambian ante nós.

A exposición convida a experimentar, a mirar con atención e a deixarse enganar pola ciencia… pero en galego!

📍Tes as ilusións expostas na entrada do instituto. Comproba por ti mesm@ como a realidade pode ser cuestión de perspectiva.

 

 

Novembro: Mes da Ciencia en Galego na BiblioCarballeira

🔬 Durante o mes de novembro celebramos o Mes da Ciencia en Galego, unha iniciativa das Bibliotecas Escolares de Galicia que pretende dar visibilidade á ciencia feita na nosa lingua e poñer en valor o papel das bibliotecas como espazos de coñecemento e divulgación.

🔬 Este ano acompañámonos do manifesto de Concepción Paz Penín, enxeñeira industrial e catedrática da Universidade de Vigo, quen nos lembra que Galicia conta cun ecosistema único de innovación e investigación, e que a ciencia, para ser completa, debe chegar a toda a sociedade.

🔗 Podes ler o Manifesto 2025, escrito por Concepción Paz Penín, premendo nesta ligazón → Ler o manifesto 

🔬 As bibliotecas, tamén as escolares, son unha parte esencial deste proceso: lugares onde a curiosidade se converte en coñecemento e onde o galego se consolida como lingua de ciencia, tecnoloxía e futuro.

🔬 Ao longo deste mes, na BiblioCarballeira dedicaremos espazos e actividades para achegarnos á ciencia en galego: estade atent@s para descubrilos.

📍 Pásate pola biblioteca e descobre como a ciencia tamén fala galego. Porque coñecer, investigar e innovar na nosa lingua é seguir tecéndose o futuro desde Galicia.

 

 

Hoxe celebramos o II Concurso de epitafios

Creatividade, humor e un toque de misterio polo Samaín

A Biblioteca do IES Johan Carballeira volve converterse, por uns días, nun pequeno cemiterio literario. Dentro das actividades de Samaín, celebramos o II Concurso de Epitafios, unha proposta que combina imaxinación, humor e expresión literaria.

O alumnado elaborou os seus propios epitafios orixinais, breves textos que xogan coa ironía, a reflexión ou o sarcasmo, acompañados das súas lápidas personalizadas, creadas con todo detalle e moita creatividade.

As obras están expostas na biblioteca, transformando o espazo nun auténtico paseo entre versos e humor negro. Durante estes días, quen se achegue poderá gozar da exposición. Na xornada do xoves 6 calquera pode votar polos seus epitafios favoritos.

Parabéns a todo o alumnado participante por tanta orixinalidade… e por facer que ata os mortos resuciten de risa! 💀📚

📸 Deixámosvos aquí algunhas imaxes da exposición.

 

 

  

Seguimos celebrando o Día das Bibliotecas coas máis bonitas

Aínda coa emoción do venres pasado (o Día das Bibliotecas), queremos seguir rendéndolle homenaxe ás bibliotecas do mundo. Hai lugares que son auténticos templos do saber, espazos que combinan arquitectura, arte e paixón polos libros.

📚 Neste artigo que compartimos podes descubrir as 10 bibliotecas máis fermosas do mundo, dende as máis antigas e monumentais ata as máis modernas e vangardistas. Son un recordatorio de que a lectura é tamén unha viaxe a través dos espazos e do tempo.

👉 Ler o artigo completo

E para acompañar esta viaxe, deixámosche unha fotografía da nosa biblioteca: máis modesta, pero igual de chea de vida, palabras e historias.
Porque non hai biblioteca pequena cando está habitada por lectoras e lectores.

 

24 de outubro: Día das Bibliotecas

Dende 1997 celébrase cada 24 de outubro o Día das Bibliotecas, unha conmemoración que comezou impulsada pola Asociación de Amigos del Libro Infantil y Juvenil e á que se foron sumando co tempo o Ministerio de Cultura e todas as administracións autonómicas.

Este ano, a Dirección Xeral do Libro, o Cómic e a Lectura propón o lema “Contra a desinformación: bibliotecas”, destacando así o papel esencial que todas as bibliotecas —públicas, escolares, universitarias, especializadas ou nacionais— teñen na loita contra a desinformación. 

As bibliotecas non son só lugares para atopar libros ou prensa, senón tamén espazos que nos ensinan a empregar con criterio as novas tecnoloxías, a buscar fontes fiables e a distinguir información veraz fronte a bulos. O traballo do persoal bibliotecario é clave: actúa como guía e garante para que a comunidade dispoña de información contrastada e segura.

No noso contexto, as bibliotecas escolares galegas convertéronse nun recurso imprescindible para a formación dunha cidadanía crítica, activa e comprometida, en liña coa Axenda 2030 e co compromiso de que ninguén quede atrás. A biblioteca escolar é, ademais, a primeira porta de entrada ao mundo das bibliotecas: o lugar que nos ensina a usar outras, que nos pon en contacto coas públicas e que nos amosa que sempre temos unha biblioteca preto de nós.

No IES Johan Carballeira queremos sumarnos a esta celebración lembrando que a nosa biblioteca é un espazo aberto a toda a comunidade educativa: un lugar de encontro, aprendizaxe, creatividade e confianza. Contra a desinformación, e a favor dunha educación crítica e responsable, as bibliotecas somos un piar fundamental.

Coñece E-LBE.2, unha biblioteca en liña

A Asesoría de Bibliotecas Escolares organiza un novo seminario web para familias, centrado nas posibilidades que ofrece E-LBE.2, a ferramenta dixital de lectura e préstamo electrónico do programa de bibliotecas escolares de Galicia.

🗓 Data: mércores 29 de outubro
🕕 Hora: de 18:00 a 18:45

Durante esta sesión presentarase un conxunto de ferramentas de accesibilidade e recursos pensados para facer da lectura unha actividade compartida en familia. Será unha boa ocasión para descubrir como axudar ás crianzas a ler máis, mellor e con máis autonomía.

📍 Podes inscribirte premendo na ligazón de participación: Apúntate aquí

Anímate a participar e continúa facendo da lectura unha experiencia para compartir na casa!

 

Concurso: De quen é esta biblioteca?

O 24 de outubro imos celebrar o Día das Bibliotecas, e no IES Johan Carballeira queremos facelo dun xeito divertido e participativo. Este ano propoñémosche un concurso moi especial: De quen é esta biblioteca?

Na entrada do instituto atoparás unha exposición de fotografías das bibliotecas persoais de varios docentes do centro. Cada unha amosa unha pequena parte da súa personalidade lectora: o tipo de libros que colecciona, a forma en que os organiza ou mesmo os obxectos que os acompañan.

O reto consiste en acertar a quen pertence cada biblioteca. Podes participar observando as imaxes expostas e introducindo a túa folla de respostas na urna. O prazo remata o venres 24 no recreo.

🏆 A persoa gañadora será quen máis acertos consiga… e levará un pequeno premio lector!

Anímate a participar e a descubrir o lado máis lector do profesorado. Porque detrás de cada estante hai unha historia, e detrás de cada libro, unha persoa que o fai seu.

 

Día das Escritoras 2025

📖 O luns máis próximo ao 15 de outubro celébrase o Día das Escritoras, unha data promovida pola Biblioteca Nacional de España, a Federación Española de Mulleres Directivas, Executivas, Profesionais e Empresarias (FEDEPE) e a Asociación Clásicas y Modernas. Este ano esa data é o luns 13.

O seu obxectivo é recoñecer o labor das mulleres na literatura e loitar contra a discriminación que, ao longo da historia, silenciou tantas voces femininas. A esencia desta celebración é reivindicar as palabras das escritoras, lembrar o seu legado e descubrir novas voces que seguen transformando o mundo desde a literatura.

Na Biblioteca do IES Johan Carballeira sumámonos a esta celebración con lecturas, exposicións e recomendacións de autoras galegas, españolas e internacionais. Poesía, narrativa, ensaio, divulgación ou banda deseñada: múltiples camiños para expresar o talento das mulleres que escriben.

👉 Pásate pola biblioteca e bota unha ollada á nosa selección de títulos: atoparás obras para emocionarte, pensar e descubrir perspectivas que enriquecen o noso modo de entender o mundo.

👍 Queremos agradecer ao IES Lamas de Castelo que modificase e traducise ao galego o logo oficial proposto para esta edición pola Biblioteca Nacional. É o que podes ver un pouco máis arriba.

 

Comeza a Hora de Ler

Un curso máis, o IES Johan Carballeira participa na iniciativa da Hora de Ler, un tempo semanal que todas as clases dedican á lectura individual. Son 20 minutos por sesión, ao principio ou ao final da clase, para que cada estudante poida desconectar, concentrarse e deixarse levar polas páxinas dun libro.

O luns 13 de outubro comezamos con esta rutina. Lembrádeo para traer o libro que máis vos apeteza. 

 

A lectura diaria é un hábito que trae múltiples beneficios: mellora a fluidez, enriquece o vocabulario, potencia a imaxinación e contribúe a formar un pensamento crítico. Non importa o que leas —novela, poesía, banda deseñada, divulgación— o importante é que o fagas con gusto.

Na biblioteca temos moitas opcións para escoller: podes traer o teu libro da casa, collelo en préstamo na biblio ou empregar un dos exemplares do armario da aula.

Lembrade: a lectura é obrigatoria, pero tamén é un pracer. Canto máis les, máis ganas tes de seguir lendo.

 

 

O recuncho dos xogos de mesa, un clásico da nosa Biblioteca

Entre todas as actividades que se desenvolven na Biblioteca do IES Johan Carballeira, hai unha que sempre destaca polo éxito e a participación: o recuncho dos xogos de mesa.

Dende hai tempo, este espazo é un punto de encontro durante os recreos, no que o alumnado vén xogar, divertirse e compartir tempo cos seus compañeiros e compañeiras. Pero non se trata unicamente dun pasatempo: os xogos de mesa axudan a mellorar a estratexia, a cooperación, a concentración e, sobre todo, favorecen a convivencia.

A boa acollida que sempre teñen demostra que aprender tamén pode ser lúdico e que a biblioteca é moito máis ca un lugar para ler: é un espazo vivo, aberto e participativo.

Se aínda non xogaches, convidámoste a probar: seguro que atopas un xogo axeitado para ti. Temos bastante variadade. E, se non, achégate a quen estea de garda na biblioteca para preguntar polos xogos que máis che gustan. Igual podemos compralo!

 

Comeza o Club de Lectura Rolendis 2025-26

No IES Johan Carballeira retomamos o noso Club de Lectura Rolendis, unha actividade pensada para gozar da lectura en compañía e descubrir novas historias ao longo do curso.

Cada trimestre o grupo escollerá un libro diferente, que leremos e comentaremos entre todas e todos, convertendo cada encontro nun espazo de conversa, reflexión e diversión compartida.

O club está aberto a todo o alumnado interesado. Só tes que pasar pola Biblioteca e anotarte. Ademais de ler, teremos ocasión de falar das nosas impresións, de conectar coas personaxes e de viaxar con elas a mundos reais e imaxinados.

Se che apetece ler e desfrutar xunto ao resto da comunidade educativa, apúntate xa ao Club de Lectura Rolendis. Prometemos aventuras, emocións e moi boas conversas arredor dos libros.Temos varias opcións: club de manga, club de narrativa, club en inglés...