Presentación de 'Cartografía dos nomes'

O próximo luns ao acabar as aulas teremos a presentación do libro 'Cartografía dos nomes' da nosa compañeira a profesora e poeta Lucía Durán Paredes. Presentará o acto a profesora Fernanda González Briones. Trátase dun libro de poemas publicado pola editorial Apiario e gañador do premio Filomena Dato no 2021. Será, como non, na Biblioteca e comezará ás 17:45 do luns 28 de novembro. Estades todos e todas convidadas a vir!

Concurso de debuxo

Non todo nesta vida vai ser ler. Tamén temos que deixar oco, por exemplo, para practicar as nosas habilidades pictóricas. É así que o Club de Lectura do IES Johan Carballeira, coa colaboración do Departamento de Artes Plásticas, organiza este mes un concurso de debuxo.

Como? Que non se che ocorre ningunha idea? Tranquilidade, tes tempo: o prazo de participación remata o mércores 14 de decembro. 

Ademais, para canalizar toda esa creatividade que pugna por saír ao mundo, neste concurso debes inspirarte nun libro, cómic ou manga para realizar o teu debuxo. 

E só hai outra condición, e é que o orixinal ten que facerse nun folio de tamaño A4.

E aínda que o goce do proceso é satisfacción máis que suficiente para lanzarse a debuxar, nesta ocasión, hai premios. Si, efectivamente, os tres mellores debuxos levan premio (que será?). Comparte o teu talento e anímate a participar!

Premios na V edición do concurso "Cambados, mar de letras"

Chegan boas noticias dende Cambados. Un ano máis, O IES Francisco Asorey, co patrocinio do Concello de Cambados, convocou o Premio Literario “Cambados, Mar de Letras”; xa van cinco edicións.

Todas as lectoras e lectores deste blog estarán pensando agora cales son esas boas noticias. Pois resulta que tras coñecer o fallo do concurso, entre as persoas premiadas aparecen varias do noso centro, o IES Johan Carballeira. Parabéns! Estamos desexando ler as obras agraciadas.

Dende a Biblioteca sempre nos alegramos de todas as actividades que teñen relación cos libros e a escritura. Lamentamos a mala calidade das fotos, pero o que non lamentamos é o anuncio das persoas premiadas; o orgullo que nos enche é enorme.

• Iago Álvarez Cabodevila (1.º Bacharelato C) foi agraciado co primeiro premio na modalidade de poesía, por 'Errar e non poder levantar'.
• Raquel Martínez Badea (1.º Bacharelato C) foi agraciada co primeiro premio na modalidade de relato curto por 'Querido papá'.
• Ademais, no libro conxunto que se publicará a modo de recompilación tamén aparecerá o relato 'Volve, Ada' de Nuria Estévez Rodríguez (1.º Bacharelato A).

Resolución do concurso de epitafios

Unha vez localizados todos os membros do xurado que se perderan, e tras serias ameazas para conseguir que emitisen o seu veredicto (hai un que xura e perxura que non vai volver ser xurado nunca, pois case lle quebra a cabeza ao ter que tomar unha decisión), xa foron entregados os tres premios do concurso de epitafios. Estes son:

O epitafio merecente do terceiro premio debémosllo ás cabezas pensantes de Manel, Uxía, Alejandra e María. Nada máis e nada menos que un cuarteto é o que está detrás deste curioso epitafio.

O segundo premio, no bordo do éxito máis absoluto, pero igualmente con gran mérito, vai para Leire Padín e Iria Casal.

E por último, o primeiro premio foi parar a... redobre de tambores... ran rataplán! O flamante gañador do I concurso de epitafios da Biblioteca do IES Johan Carballeira, na súa edición do 2022, é... JAIME PASTORIZA!

Moitos parabéns para Jaime, pero tamén para o resto de persoas premiadas e para todas aquelas que participaron no concurso, xa que os bos momentos pasados permanecen para sempre.

E dende este mesmo momento, que todo o mundo siga con atención as redes da biblioteca (neste insigne blog, ou no máis moderno Instagram) para non perderse próximos eventos e concursos que se organicen. Xentiña, vémonos na biblioteca!