Biblio Carballeira

Lecturafilia únse á nosa II Feira. Aquí vos presentamos a voz desta web.

Tensi Gesteira é graduada en periodismo pola Universidade de Santiago de Compostela, e creadora do blog de literatura Lecturafilia, onde publica reseñas de libros, tanto en galego como en castelán, ademais de entrevistas con autores/as e demais xentes relacionadas co mundo cultural. Moi interesada en ver o mundo con outra mirada, nos últimos tempos interesouse pola literatura e as reflexións relacionadas co feminismo.

Actualmente desempeña a súa actividade laboral no gabinete de comunicación do concello de Bueu, e nos seus tempos de lecer goza moito lendo acompañada dun bo té verde. O seu lema é ler é vivir dúas veces.

Aquí vos deixamos a súa primeira reflexión sobre a II Feira da Ciencia e da Literatura. Agardamos que vos guste.

A señorita Bubble

Recoñece Ledicia Costas que de pequena lía moitos libros, que gustaba de xogar coas palabras, darlles a volta e poñelas do revés, aprender termos novos cada día. Por iso non resulta estraño descubrila nesas historias que crea nas que a maxia e as personaxes entrañables están moi presentes.

Comezamos a quentar motores para a II Feira da Ciencia e da Literatura, que se celebrará o 4 de maio e na que, como xa saberedes, queremos reivindicar o papel das mulleres na ciencia e na literatura, e nada mellor que comezar, pois, presentándovos A señorita Bubble, un libro infanto-xuvenil de Ledicia Costas no que se presenta a dúas irmás que van ao colexio e que esquecen devolver un libro á biblioteca, motivo polo que son castigadas polas súas profesoras. Debido a iso deciden fuxir da escola e no camiño atópanse cunha personaxe extravagante: Lady Bubble, unha muller que as levará á súa morada para ensinarlles os seus inventos.

Lady Bubble é unha muller adiantada ao seu tempo e nela danse todas as ideas que desde sempre estiveron detrás da ciencia: a súa rareza e a oposición dalgúns sectores da sociedade. E é que toda a vila está en contra dela dado que se rumorea que na súa casa come á rapazada. Mais, o que pouca xente sabe ou se molestou en coñecer é que Lady Bubble ten unha serie de obxectos e de mecanismos cos que pode levar sorrisos ou choros ás persoas, amais de crear larpeiradas ben saborosas.

Noa e Sofi, as dúas irmás descobren a maxia da ciencia e da humanidade na casa da señorita Bubble, na que tamén terán a oportunidade de facerse amigas de Vincent, ese neno co corazón debilitado e para o que a muller crea unha solución, ou a gata e a cobaia. Quizais, onde mellor se expresa esa emoción sentida ante a descuberta é cando se abre a porta:

“-Ábrete, Sésamo!

E tan pronto a señorita Bubble pronunciou esas palabras, as portas metálicas abríronse, mostrando todo un mundo onde a ciencia e a tecnoloxía latían coa forza dun corazón mecánico”.

Acompañada dunhas marabillosas ilustracións a cargo de Andrés Meixide, esta historia resulta un exemplo evidente de como a ciencia e a literatura teñen moito en común. Non en van, as dúas irmás aman a lectura e tamén ese mundo que descobren da man da señorita Bubble, moi apegado á ciencia e ao seu sentir. Aínda que tamén hai espazo para a reflexión sobre o mundo infantil, ese mundo ignorado moitas veces polas persoas adultas e que nos ten tanto que ensinar, ademais dunha defensa da manifestación dos sentimentos, é dicir do dereito a rir e a chorar. E, como non, onde as nenas teñen un protagonismo esencial, aspecto moi a reivindicar aínda hoxe en día.

En definitiva, non podedes deixar de ler A señorita Bubble, historia da que gozaredes tanto pequen@s como maiores, pois a maxia e a aventura non ten idade.

Seguimos camiñando cara a II Feira da Ciencia e da Literatura, acompañádesnos?

Ficha técnica

Título: A señorita Bubble

Autora: Ledicia Costas

Editorial: Xerais

Ano de publicación: 2017

Número de páxinas: 168

A globalización vista dende a viaxe dun chaleco

Credes no poder das persoas? Pensades que é posible mudar o mundo con pequenas accións? O libro de La vuelta al mundo de un forro polar rojo, do autor alemán Wolfgang Korn demóstranos que si, que as persoas temos máis poder do que cremos, e fainos tomar conciencia de que as nosas decisións sempre teñen repercusión na sociedade.

Continuando coa aposta da II Feira da Ciencia e da Literatura polos libros que unan estas dúas disciplinas, hoxe presentámosvos un libro moi potente e orixinal, sobre todo porque é quen de falarnos da globalización e do que esta simboliza aproveitando a viaxe dun chaleco vermello polas diversas partes do mundo, desde que se fabrica ata que alguén o merca por catro patacóns. O que se nos vén a dicir é que hoxe en día todo o mundo está conectado, o que ten vantaxes mais tamén inconvenientes.

Comecemos polo inicio. O termo globalización deriva de globo, unha esfera que recrea o noso planeta e no que están representados todos os países e mares. O profesor de economía Theodore Levitt, americano nacido en Alemaña, acuñou en 1983 este termo que describe ata que punto toda a actividade económica do mundo é interdependente hoxe en día, dunha forma nunca antes vista, na que están en xogo obxectos, moda, música, diñeiro e, non o ides crer, ata ideas. Así, de boas a primeiras, o termo semella moi positivo para o ser humano, pero non todo é ouro o que reloce, pois a globalización está levando a un empobrecemento dos países subdesenvolvidos e un enriquecemento dos grandes poderes económicos que se aproveitan da situación. A iso hai que sumar a unificación de pensamento á que tende a sociedade, dado que desde grandes bloques como Estados Unidos trasládase que a súa cultura e idioma son os únicos válidos, e desvirtúanse as tradicións doutros pobos, sobre todo dos africanos, idea que se desenvolve máis polo miúdo en Los peligros de la historia única, de Chimamanda Ngozi Adichie.

E no medio deste avance das sociedades, o autor convídanos a realizar as nosas pequenas revolucións, con exemplos de persoas que apostan por instalar placas solares nas súas vivendas ou por mercar no comercio xusto. Precisamente esa humanización do contido e o estilo divulgativo fan deste libro un manual imprescindible para iniciarse no que significa a globalización e a responsabilidade que as persoas temos como catalizadores dun cambio que ten que darse desde abaixo.

Por último, e dado que esta feira pretende destacar o papel das mulleres, quixera facer unha mención á perspectiva feminista que está presente nalgunhas partes do relato, pois o autor é consciente, e así nolo transmite, de que as mulleres teñen unha loita máis dura ao partiren de situacións máis desfavorecidas. E senón pensemos nas fábricas de Bangladesh nas que traballan miles de mulleres, sometidas a condicións estremas e salarios ínfimos. Elas cosen sen parar roupa que nace de explotación e que se vende a prezos baratísimos neste primeiro mundo.

Ficha técnica

Título: La vuelta al mundo de un forro polar rojo

Autor: Wolfgang Korn

Editorial: Siruela

Año de publicación: 2017

Número de páginas: 135